1Ch 11 | NdeIBE | STEP | Bonke abako-Israyeli baya kuDavida eHebhroni bafika bathi: “Thina siyizihlobo zakho. Esikhathini esedluleyo,

1 Chronicles 11

UDavida Uba Yinkosi Yako-Israyeli

1 Bonke abako-Israyeli baya kuDavida eHebhroni bafika bathi: “Thina siyizihlobo zakho. Esikhathini esedluleyo,

2 lanxa uSawuli eseseyinkosi, nguwe owawuvele ukhokhela u-Israyeli empini. Njalo uJehova uNkulunkulu wakho wathi kuwe, ‘Wena uzakuba ngumalusi wabantu bami u-Israyeli, uzakuba ngumbusi wabo.’ ”

3 Ekufikeni kwabadala bako-Israyeli bonke kuDavida inkosi eHebhroni, wenza isivumelwano labo eHebhroni phambi kukaJehova, bamgcoba uDavida ukuba abe yinkosi ka-Israyeli, njengesithembiso sikaJehova asenza ngoSamuyeli.

UDavida Unqoba iJerusalema

4 UDavida labo bonke abako-Israyeli baya eJerusalema (kusitsho iJebusi). AmaJebusi ayehlala khona 5 athi kuDavida, “Ungeke ungene lapha.” Kodwa lanxa kunjalo, uDavida wayithumba inqaba yaseZiyoni, uMuzi kaDavida.

6 UDavida wayethe, “Ozakhokhela ekuhlaseleni amaJebusi uzakuba nguMlawuli omkhulu wempi.” UJowabi indodana kaZeruya nguye owaqala ukuya khona, ngakho wazuza ubukhokheli.

7 UDavida wasehlala enqabeni, yikho yathiwa ibizo lokuthi nguMuzi kaDavida.

8 Wakha idolobho nxa zonke kusukela emawatheni kuze kuyefinyelela emidulini ehonqolozeleyo, ngaleso sikhathi uJowabi esakha evuselela umuzi. 9 UDavida waqhubeka njalo waba lamandla, ngoba uJehova uSomandla wayelaye.

Amaqhawe KaDavida

10 Lezi yizinduna zamaqhawe kaDavida – ezazimsekele ngokuqinileyo embusweni, kanye laye wonke u-Israyeli, ukuba abe yinkosi, njengokuthembisa kukaJehova. 11 Lolu yiluhlu lwalawo maqhawe kaDavida: uJoshobheyamu, umHakhimoni, waye ngumlawuli wezikhulu; ekulweni kwakhe wadla amadoda angamakhulu amathathu ngomkhonto adibana lawo ngasikhathi sinye.

12 Yena elandelwa ngu-Eliyazari indodana kaDodayi umAhohi omunye wamaqhawe amathathu. 13 Wayekade eloDavida ePhasi Damimi, ekuhlomeni kwamaFilisti elungiselela ukudibana empini. Endaweni ethile kwakulensimu yebhali, lapho amabutho abaleka khona ebalekela amaFilisti. 14 Kodwa bona bema bajama phakathi kwensimu. Bayivikela bawabulala amaFilisti, uJehova wabapha ukunqoba okukhulu.

15 Izinduna ezintathu kwezingamatshumi amathathu zaya edwaleni kuDavida ebhalwini lwaseAdulami, ngalesosikhathi amanye amaFilisti ayebuthene eSigodini saseRefayimi.

16 Ngalesosikhathi uDavida wayesenqabeni, iviyo lamabutho amaFilisti laliseBethilehema.

17 UDavida womela amanzi okunatha wasesithi, “Kungathi kungaba lomuntu ongangikhela amanzi wona atholakala esangweni laseBhethilehema!” 18 Ngakho abathathu laba badabula phakathi kweviyo lamaFilisti bayakukha amanzi eduzane lesango laseBethilehema bayawanika uDavida. Kodwa wala ukuwanatha, wakhetha ukuwathululela phambi kukaJehova. 19 Wasesithi, “UNkulunkulu kangangivumeli ukukwenza lokhu! Kufanele yini ukuthi nginathe igazi lalababantu abanikele impilo yabo engozini bewaletha?” Ngalokho wala ukuwanatha. Lezizinto zenziwa yilawo maqhawe amathathu.

20 U-Abhishayi umfowabo kaJowabi nguye owaba ngumlawuli wamaqhawe amathathu. Wagiya ngomkhonto wakhe phezu kwabangamakhulu amathathu, ababulalayo, ngakho wazuza ubuqhawe njengalaba abaThathu ababengamaqhawe. 21 Waba lodumo oluphindwe kabili phezu kwalaba abaThathu waze waba ngumlawuli wabo, loba engazange abe phakathi kwabo.

22 UBhenayiya indodana kaJehoyada wayeliqhawe elilesibindi evela eKhabizeli engumuntu owenza izimanga ezinkulu. Wabulala amaqhawe amaMowabi amabili ayezintshantshu ekulweni. Wake wangena emgodini wabulala isilwane mhla kulongqoqwane. 23 Wabulala umGibhithe owayemude okwezingalo eyisikhombisa njalo eqatha. Lanxa umGibhithe wayephethe umkhonto esandleni kwakungani uphethe usungulo lokuthunga, uBhenayiya waqondana laye ngenduku. Wahluthuna umkhonto esandleni somGibhithe wambulala ngawo umkhonto wakhe. 24 Zazingako iziga zikaBhenayiya indodana kaJehoyada. Yikho laye wayelendumela efanana leyamadoda amathathu. 25 Yena-ke wayehlonitshwa kakhulu ukwedlula bonke abangamatshumi amathathu, ko-dwa kasabalwanga kwabaqakathekileyo abaThathu. UDavida wamenza umlawuli wabalindi bakhe.

26 Amaqhawe ayelamandla yila: ngu-Asaheli umfowabo kaJowabi, lo-Elihanani indodana kaDodo oweBhethilehema,

27 loShamothi umHarori, loHelezi umPheloni,

28 lo-Ira indodana ka-Ikheshi ovela eThekhowa, lo-Abhiyezeri owe-Anathothi,

29 loSibhekhayi umHushathi, lo-Ilayi um-Ahohi,

30 loMaharayi umNethofathi loHeledi indodana kaBhahana umNethofathi,

31 lo-Ithayi indodana kaRibhayi owaseGibheya koBhenjamini, loBhenayiya umPhirathoni,

32 loHurayi owasezindongeni zaseGahashi, lo-Abhiyeli um-Aribhathi,

33 lo-Azimavethi umBhaharumi, lo-Eliyaba umShalibhoni,

34 amadodana kaHashemi umGizoni, loJonathani indodana kaShageye umHarari,

35 lo-Ahiyamu indodana kaSakhari umHarari, lo-Elifali indodana ka-Uri,

36 loHefa indodana kaMekherathi, lo-Ahija umPheloni,

37 loHezironi umKhameli, loNarayi indodana ka-Ezibhayi,

38 loJoweli umfowabo kaNathani, loMibhari indodana kaHagiri, 39 loZelekhi um-Amoni, loNaharayi umBherothi, owayethwala izikhali zikaJowabi indodana kaZeruya,

40 lo-Ira um-Ithiri, loGarebhi um-Ithiri,

41 lo-Uriya umHithi, loZabhadi indodana ka-Ahilayi,

42 lo-Adina indodana ka-Shiza owakoRubheni, owayeyinduna yakoRubheni, kanye labangamatshumi amathathu ababelaye,

43 loHanani indodana kaMahakha, loJoshafathi umMithini,

44 lo-Uziya um-Ashitherathi, loShama loJehiyeli amadodana kaHothamu um-Aroweri,

45 loJediyayeli indodana kaShimiri, umfowabo uJoha umThizi,

46 lo-Eliyeli umMahavi, loJeribhayi loJoshaviya amadodana ka-Elinahamu, lo-Ithima waseMowabi,

47 lo-Eliyeli, lo-Obhedi kanye loJahasiyeli waseMezobha.